Sabirabadda "9 May Qələbə Günü" qeyd olundu

Sabirabad şəhəri Heydər Əliyev Mərkəzində «9 May- Qələbə günü» ilə əlaqədar tədbir keçirilmişdir. Böyük Vətən Muharibəsində həlak olan insanların əziz xatirəsi 1 dəqiqəlik sükutla yad edilmişdir. Tədbirdə Sabirabad rayon İcra Hakimiyyətinin başçısı Nazim İsmayılov Qələbə günü ilə bağlı geniş nitq söyləmişdir. O qeyd etmişdir ki, Böyük Vətən Müharibəsi illərində (1941-1945) Azərbaycan xalqı həm ön, həm də arxa cəbhədə çox böyük qəhrəmanlıq və şücaət nümunələri göstərmişdir.  Azərbaycanın 600 mindən çox igid oğul və qızları cəbhəyə yollanmışdı. Azərbaycan diviziyaları Qafqazdan Berlinə qədər şərəfli döyüş yolu keçmişdir. Həmvətənlərimizin təqribən 130 nəfəri Sovet İttifaqı Qəhrəmanı adına layiq görülmüş, 30 nəfəri “Şöhrət” ordeninin hər üç dərəcəsi ilə təltif edilmişdir. Azərbaycandan olan 170 min əsgər və zabit SSRİ-nin müxtəlif orden və medalları ilə təltif olunmuşdur. İki dəfə Sovet İttifaqı Qəhrəmanı Həzi Aslanov, Sovet İttifaqı Qəhrəmanları İsrafil Məmmədov, Aslan Vəzirov, Adil Quliyev, Ziya Bünyadov, Gəray Əsədov, Məlik Məhərrəmov, Mehdi Hüseynzadə, generallar Mahmud Əbilov, Akim Abbasov, Tərlan Əliyarbəyov, Hacıbaba Zeynalov və bir çox başqaları öz şücaətləri ilə xalqımızın tarixinə yeni səhifələr yazmışlar.
Akademik Yusif Məmmədəliyevin rəhbərliyi altında aviasiya benzini alınmasının yeni texnologiyası yaradılmışdı. Neftçilərimizin fədakar əməyi sayəsində Azərbaycan tarixində neft hasilatı üzrə rekord göstərici əldə edilmiş, 1941-ci ildə 23,5 milyon ton “qara qızıl” çıxarılmışdı. Bu, SSRİ-də çıxarılan bütün neftin 71,4 faizini təşkil edirdi. Bütövlükdə müharibə illərində Azərbaycan neftçiləri ölkəyə 75 milyon ton neft, 22 milyon ton benzin və digər neft məhsulları vermişdilər. İnamla demək olar ki, Bakı nefti faşizm üzərində qələbənin əsas amillərindən biri olmuşdur. Təkcə onu demək kifayətdir ki, hər beş təyyarədən dördü, hər beş tankdan dördü, hər beş avtomobildən dördü Bakıdan göndərilən yanacaqla işləyirdi. Böyük Vətən müharibəsi Azərbaycan xalqının kütləvi qəhrəmanlıq və fədakarlığını nümayiş etdirmişdir.
Bayram tədbirində Sabirabad rayon Hərbi Səfərbərlik və Hərbi xidmətə  Çağırış üzrə Dövlət Xidməti Sabirabad rayon şöbəsinin rəisi polkovnik leytenant Rəsul Babayev, rayon Ziyalılar Cəmiyyəti idarə heyətinin sədri Böyükağa Həmidov, Azərbaycanın 223-cü atıcı diviziyasının yeganə sağ qalan döyüşçüsü Zülfəli Əliyev çıxış etmişlər.