“Musiqidən Kitabadək” layihəsinə yekun vuruldu

Gənclərin Sosial Tərəfdaşlığı Mərkəzi İctimai Birliyi (GSTM) Azərbaycan Respublikasının Prezidenti yanında Gənclər Fondunun maliyyə dəstəyi ilə icra etdiyi “Musiqidən Kitabadək” layihəsinə yekun vurdu.
Sabirabad  rayon Mədəniyyət Mərkəzində baş tutan yekun tədbirdə həm də Birliyin illik hesabat konfransı keçirildi.
Gənclərin Sosial Tərəfdaşlığı Mərkəzi İctimai Birliyinin sədri Vüsal Əhmədov iştirakçıları salamlayaraq Birliyin 2016-cı ildə gördüyü işlər barədə məlumat verdi. Onun bildirdiyinə görə, Gənclərin Sosial Tərəfdaşlığı Mərkəzi İctimai Birliyi 2016-cı ildə də, cənab prezident İlham Əliyevin həyata keçirdiyi gənclər siyasətinə dəstək olaraq gənclərin maraq dairələrində olan layihələr həyata keçirib: “Geridə qoyduğumuz 2016-cı ildə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası, Azərbaycan Respublikasının Prezidenti yanında Gənclər Fondunun maliyyə yardımları ilə 3 böyük layihə həyata keçirilib. “Yurdumun gözəlliyi Gənclərin gözü ilə”, “Mən Bacaracam!”, “Musiqidən kitabadək” layihələri Bakı, Şəki, Quba, Sabirabad, Saatlı, İmişli, Şirvan şəhərləri olmaqla 2000-dən çox gənci birbaşa və dolayı yollarla əhatə edib. Bundan əlavə, 2016-cı il cənab Prezident İlham Əliyevin sərəncamı ilə “Multikulturalizm ili” elan olunduğundan Türkiyənin Sakarya şəhərində yerləşən Sakarya Dövlət Universitetində Sakarya Gençlik Hizmetleri ve Spor İl Müdürlüğü ilə birlikdə “Baharın Gelişi-Azerbaycanın ülke tanıtımı” adlı tədbir təşkil edilib”. QHT sədri əlavə edib ki, 2017-ci ildə də GSTM İB əvvəlki illərdə olduğu kimi, icra edəcəyi layihələrlə dövlətin apardığı gənclər siyasətinə öz dəyərli töhfələrini verəcək.
Sabirabad rayon İcra Hakimiyyəti başçısının birinci müavini Həsən Həsənov tədbir iştirakçılarını salamlayaraq əvvəlcə 2 fevral Gənclər günü münasibətilə bütün gəncləri təbrik edib və bu günün Ulu öndər Heydər Əliyevin sərəncamı ilə 21 il əvvəl təsis edildiyini xatırladıb. Gənclərin daim fəal olduğunu deyən H. Həsənov bunun dövlətin uğurlu gənclər siyasətinin nəticəsi olduğunu vurğuladı.
Prezident Administrasiyasının İctimai-siyasi məsələlər şöbəsinin Gənclər təşkilatları ilə iş sektorunun müdiri Vüsal Quliyev çıxış edərək, regionlarda gənclərlə işin yüksək səviyyədə qurulduğunu diqqətə çatdırıb. Bildirib ki, bu gün əsası Ulu öndər Heydər Əliyev tərəfindən qoyulmuş, Azərbaycan Respublikasının prezidenti cənab İlham Əliyevin rəhbərliyi ilə davam etdirilən uğurlu gənclər siyasətinin nəticəsidir ki, ölkəmizdə layiqli gənclik yetişir: “Azərbaycan gəncliyi yüksək biliklərə yiyələnməklə, müasir dünyagörüşünə sahib olmaqla, eyni zamanda, azərbaycançılıq ideyalarına yiyələnməklə ölkəmizin layiqli vətəndaşları kimi formalaşırlar”. V. Quliyev əlavə edib ki, son illərdə gənclərlə bağlı dövlət proqramlarının qəbul edilməsi, İnkişaf Strategiyasının təsdiq olunması, Prezident yanında Gənclər Fondunun yaradılması, çoxlu sayda gənclər evlərinin inşası və digər tədbirlər onu göstərir ki, ölkə rəhbəri gənclərimizin öz bilik və bacarıqlarını üzə çıxarmalarına, potensiallarını effektli reallaşdırmalarına, cəmiyyətdə layiqli yer tutmalarına münbit şərait yaradıb. Fəxr hissi ilə deyə bilərik ki, Azərbaycan bu gün gənclərin inkişafı üçün geniş imkanlar yaradan ən qabaqcıl ölkələr sırasındadır.
V.Quliyev region gənclərinin inkişafı üçün yaradılan şəraitə də xüsusi diqqət yönəltdi, onları bu imkanlardan səmərəli istifadə etməyə dəvət etdi.
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası Katibliyinin məsləhətçisi Mirzağa Zahidov GSTM  İB-i uğurlu layihə münasibətilə təbrik edib. O, Şuranın dəstəyilə GSTM İB-in ötən il həyata keçirdiyi “Yurdumun Gözəlliyi Gənclərin gözü ilə” layihəsindən danışdı. Bildirdi ki, ilk dəfə olaraq layihə iştirakçıları donor təşkilatın ofisində olaraq Şuranın iş mexanizmi ilə yaxından tanış olublar. Bundan əlavə, onlar layihə çərçivəsində Azərbaycanın müxtəlif regionlarına səfər ediblər. M. Zahidov qeyd edib ki, Şura hər zaman maraqlı və gənclərin inkişafına təkan ola biləcək layihələrə dəstək verməyə hazırdır.
Sabirabad rayon Regional Mədəniyyət və Turizm İdarəsinin rəisi Əhməd Ramazanov uğurlu layihə münasibətilə GSTM İB-i təbrik edib, yeniyetmə və gənclərin öz istedadlarını nümayiş etdirməsi baxımından bu kimi tədbirlərin böyük önəmindən danışdı.
Sabirabad rayon Gənclər və İdman İdarəsinin rəisi Nadir Quliyev qeyd etdi ki, Azərbaycan Prezidenti İlham Əliyevin müvafiq fərman və sərəncamları gənclərin inkişafı üçün təkandır. Gənclərlə əlaqələrin vacibliyindən danışan N. Quliyev fevralın 1-dən Gİİ-nin rəsmi saytının istifadəyə veriləcəyi haqqında məlumat verdi. Yaradıcı gənclərin özlərini daha yaxından tanıtması üçün Gənclər Mərkəzində “Gənclik” FM radiosunun da fəaliyyətə başlamasını xatırlatdı.
Azərbaycan Dövlət İqtisad Universitetinin (UNEC) Tələbə Həmkarlar İttifaqı Komitəsi Mədəni və Kütləvi Tədbirlər Komitəsinin sədri Azad Mehdiyev öz növbəsində bütün gəncləri Gənclər Günü münasibətilə təbrik edib. Bildirib ki, təhsil aldığı ali məktəb gənclərlə bağlı müxtəlif layihələr həyata keçirir ki, bu da gənclərin özünü tanıtmasında müsbət rol oynayır. O, 2017-ci ildə GSTM İB ilə birlikdə maraqlı layihələr həyata keçirəcəklərini dedi.
Çıxışlar başa çatdıqdan sonra iştirakçılar rəsm əsərləri, digər əl işləri ilə yaxından tanış oldular.
Sonra istedadlı gənclərin musiqilərindən ibarət konsert proqramı oldu. Gənc istedadlar müxtəlif musiqi alətlərində ifa etdilər, mahnı ifa etdilər.
Layihəyə verdikləri dəstəyə görə bir qrup şəxsə təşəkkürnamə və sertifikatlar təqdim olundu.
Daha sonra iştirakçılar rayonda yerləşən Heydər Əliyev Mərkəzi, Gənclər Mərkəzi və Sabirabad Regional ASAN Xidmət Mərkəzi ilə tanış oldular.
Bununla da GSTM İB-in həyata keçirdiyi “Musiqidən Kitabadək” layihəsinə yekun vuruldu.