Dünya şöhrətli oftalmoloq-alim, akademik Zərifə xanım Əliyevanın xatirəsi anıldı

Dünya şöhrətli oftalmoloq-alim, SSRİ Tibb Elmləri Akademiyasının akademiki, M.İ.Averbax adına mükafatın laureatı, əməkdar elm xadimi, akademik Zərifə Əziz qızı Əliyevanın anadan olmasının 93 illiyi respublikamızın hər yerində olduğu kimi, rayonumuzda da yüksək səviyyədə qeyd olunmuşdur.
Aprelin 28-də idarə, müəssisə və təşkilatların rəhbərlərinin, ziyalıların, gənclərin, ictimaiyyətin nümayəndələrinin iştirakı ilə Heydər Əliyev Mərkəzində ümumrayon tədbiri keçirilmişdir.
Tədbir iştirakçıları əvvəlcə Heydər Əliyev Mərkəzinin ekspozisiya zalında akademik Zərifə Əliyevanın həyat və fəaliyyətini əks etdirən guşə ilə tanış olmuşlar.
Akademik Zərifə xanım Əliyevanın xatirəsi bir dəqiqəlik sükutla yad edilmişdir.
Tədbirdə rayon İcra Hakimiyyətinin başçısı Nazim İsmayılov görkəmli alimin həyat və fəaliyyəti barədə məlumat verərək demişdir ki, akademik Zərifə Əliyeva həm müasir müstəqil Azərbaycan dövlətinin memarı və qurucusu, bütün mənalı ömrünü Vətənin və xalqın tərəqqisinə həsr etmiş dahi şəxsiyyət-ulu öndər Heydər Əliyevin vəfalı ömür-gün yoldaşı, sədaqətli dostu və etibarlı silahdaşı kimi, həm də müasir Azərbaycanın lideri olan möhtərəm Prezidentimiz cənab İlham Əliyevi dünyaya gətirmiş, onu insanlığın ən yüksək dəyərləri ilə tərbiyə etmiş bir ana kimi xalqımız üçün misilsiz bir şəxsiyyətdir. Zərifə Əziz qızı Əliyeva yaddaşlarda dünya şöhrətli oftalmoloq-alim, qayğıkeş pedaqoq, şəfqətli həkim, müdrik insan, ləyaqətli ziyalı, sədaqətli ömür-gün yoldaşı, nümunəvi ana kimi əbədiləşmişdir.
Rayon rəhbəri Zərifə xanım Əliyevanın elmi-pedaqoji fəaliyyəti barədə geniş danışaraq bildirmişdir ki, o, onlarla elmlər doktoru və elmlər namizədinin elmi rəhbəri, məsləhətçisi olmuş, böyük bir elmi məktəb yaratmışdır. Göstərdiyi əvəzsiz xidmətlərinə görə «Əməkdar elm xadimi» fəxri adına layiq görülmüşdür. Akademik Zərifə xanım Əliyeva həm də keçmiş SSRİ-nin Sülhü Müdafiə Komitəsinin üzvü, Azərbaycan Sülhü Müdafiə Komitəsi sədrinin müavini kimi yüksək ictimai vəzifələrdə də  fədakarcasına çalışmış, bir sıra xarici ölkələrdə səmərəli görüşlər keçirərək dəyərli çıxışlar, məruzələr etmiş, dünya xalqlarını sülhə, əmin-amanlığa səsləmişdir. Onun əziz xatirəsini yad etdikcə bu parlaq şəxsiyyətin elmimizə, səhiyyəmizə, milli və mənəvi varlığımıza bəxş etdiyi dəyərləri təkrarən dərk edir, onun ölməz ruhu qarşısında bir daha baş əyirik. Zərifə xanımın ruhunun sönməz işığı və onun əziz xatirəsi həmişə insanların qəlbində yaşayacaqdır.
Tədbirin sonunda akademik Zərifə Əliyevanın həyat və fəaliyyətindən bəhs edən sənədli film nümayiş etdirilmişdir.