8 mart Beynəlxalq Qadınlar bayramı Sabirabadda qeyd edilmişdir

8 mart Beynəlxalq Qadınlar bayramı rayonumuzda təntənəli surətdə qeyd edilmişdir.Tədbir iştirakçıları öncə  ulu öndər Heydər Əliyevin abidəsi önünə gül- çiçək dəstələri düzmüşlər. Rayon Mədəniyyət Mərkəzinə toplaşmış müxtəlif sahələrdə çalışan qadınların, ictimaiyyət nümayəndələrinin qarşısında çıxış edən rayon İcra Hakimiyyətinin başçısı Nazim İsmayılov Azərbaycan qadınlarının ağlı, zəkası, hər şeydən əvvəl yüksək analıq keyfiyyətləri, müdrikliyi, sədaqəti, qəhrəmanlığı və digər müsbət keyfiyyətləri barədə geniş nitq söyləmişdir. Nazim İsmayılov xüsusi vurğulamışdır ki, ümummilli lider Heydər Əliyev qadınların əməyini yüksək dəyərləndirmiş, daim onların qayğısına qalmışdır. Bu gün həmin ənənə Heydər Əliyev kursunu ləyaqətlə həyata keçirən möhtərəm Prezidentimiz cənab İlham Əliyev tərəfindən uğurla davam etdirilir. O bildirmişdir ki, Azərbaycanın birinci xanımı, Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban Əliyevanın xidmətləri əvəzsizdir. Natiq Mehriban xanım Əliyeva başda olmaqla bütün qadınları bayram münasibətilə  təbrik etmiş, onlara cansağlığı, işlərində uğurlar, xoşbəxtlik, səadət arzulamışdır.
Tədbirdə rayonumuzun ictimai-siyasi fəaliyyətində fərqlənən qadınların bir qrupuna rayon İcra Hakimiyyətinin, YAP rayon təşkilatının Fəxri fərmanları, qiymətli hədiyyələri təqdim edilmişdir.
Tədbirin ədəbi-bədii hissəsində  incəsənət ustaları maraqlı konsert proqramı ilə çıxış etmiş, məktəblilər  anaya aid şeirlər söyləmişlər.