Azərbaycan Respublikasının Mədəniyyət və Turizm naziri Əbülfəs Qarayev rayonumuzda qəbul keçirmişdir
Azərbaycan Respublikasının Prezidenti cənab İlham Əliyevin tapşırığına əsasən mərkəzi icra hakimiyyəti orqanlarının rəhbərlərinin bölgələrdə vətəndaşlarla görüşləri davam edir. Mədəniyyət və Turizm naziri Əbülfəs Qarayev dekabrın 10-da rayonumuzda Sabirabad, Ağcabədi, Beyləqan, Saatlı, İmişli, Cəbrayıl, Füzuli, Xocavənd və Laçın rayonlarından olan vətəndaşları qəbul etmişdir.
Nazir əvvəlcə xalqımızın ümummilli lideri Heydər Əliyevin şəhərimizin mərkəzində yerləşən abidəsini ziyarət edərək, önünə gül dəstəsi qoymuşdur. Daha sonra rayon mədəniyyət evinin binasında görülmüş son tamamlama işləri ilə maraqlanmış, müvafiq tapşırıqlarını vermişdir.
Heydər Əliyev Mərkəzində keçirilən qəbula 40-dan çox vətəndaş yazılmışdı.
Nazirliyin məsul işçilərinin iştirak etdikləri görüşdə vətəndaşların müxtəlif məsələlərə dair xahiş və təklifləri səsləndirilmişdir. Müraciətlər yerlərdə mədəniyyət müəssisələrinin maddi-texniki bazasının yaxşılaşdırılması, ixtisaslı kadrlarla təminat, tarixi-mədəni irsin qorunması, xalq yaradıcılığının təbliği, uşaq incəsənət və musiqi məktəblərində yeni şöbələrin açılması və digər məsələlərlə bağlı olmuşdur. Sabirabad rayonunda xalq teatrının əlillərdən ibarət qrupunun hazırladığı tamaşaların ölkə səviyyəsində keçirilən tədbirlərdə nümayişinin təşkil olunmasına kömək göstərilməsi və s. məsələlərlə bağlı xahişlər də olunmuşdur.
Qəbul başa çatdıqdan sonra Heydər Əliyev Mərkəzində nazirliyin məsul işçilərinin, bölgənin Mədəniyyət və Turizm müəssisələri rəhbərlərinin iştirakı ilə müşavirə keçirilmişdir.
