Sabirabadda Heydər Əliyevə böyük ehtiram var
Sabirabadlılar 21 il əvvəl respublikamızda cəryan etmiş hadisələri yaxşı xatırlayırlar. Naşı, səriştəsiz, xəyanətkar rəhbərlər Azərbaycanı vətəndaş müharibəsi, parçalanmaq, dağılmaq həddinə gətirib çıxarmışdılar. Bütün sahələrdə ağır böhran hökm sürürdü. İnsanların gələcəyə inamı tükənmişdi.
Belə ağır, taleyüklü məqamda mürdik rəhbər Ümummilli lider Heydər Əliyev xalqın təkidli xahişilə hakimiyyətə gəldi, ölkəmizi bəlalardan, faciələrdən qurtardı, müstəqilliyimizi qoruyub möhkəmləndirdi. Bizə müstəqil, suveren, demokratik Azərbaycan ərmağan etdi.
Milli Qurtuluş Günü ilə başlanan bu tarixi xatırlamaq ulu öndərin xatirəsinə dərin hörmət və ehtiramlarını bildirmək üçün Sabirabad rayon İcra Hakimiyyətinin başçısı Nazim İsmayılov, rayonun hüquq-mühafizə orqanlarının rəhbərləri, ağsaqqallar, ziyalılar, ictimaiyyətin nümayəndələri Heydər Əliyev mərkəzi meydana toplaşmışdılar. Ulu öndərin abidəsi önünə gül-çiçək dəstələri düzüb onun parlaq xatirəsini ehtiramla yad etdilər.
Heydər Əliyev Mərkəzində Milli Qurtuluş Gününə həsr olunmuş geniş tədbir dövlət himninin səsləndirilməsi ilə başladı. Xalqımızın Ümummilli lideri Heydər Əliyevin 1993-cü ilin iyunun 15-də Azərbaycan Respublikası Ali Sovetinin sədri seçilməsini və nitqini əks etdirən sənədli film nümayiş olundu.
Rayon İcra Hakimiyyətinin başçısı Nazim İsmayılov məruzə ilə çıxış edərək bu günün tarixi əhəmiyyətindən, 21 il əvvəl Ulu öndərin xalqın təkidilə hakimiyyətə qayıdışından, müstəqilliyimizin qorunub möhkəmləndirilməsi və ölkəmizin dinamik inkişafı istiqamətində gördüyü işlərdən, ulu öndərimizin misilsiz xidmətlərindən ətraflı söhbət açdı. Ümummilli liderin siyasi kursunun ölkə Prezidenti cənab İlham Əliyevin rəhbərliyilə uğurla davam etdirildiyini vurğulayan N.İsmayılov bu siyasətin Sabirabad rayonunda da gözəl bəhrələr verdiyini, rayonun şəhər və kəndlərində abadlıq, quruculuq işlərinin geniş vüsət aldığını bildirdi.
Sonra YAP rayon təşkilatının sədri Nadir Quliyev, Ziyalılar Cəmiyyəti rayon təşkilatının sədri Böyükağa Həmidov Ulu öndərin keçdiyi şərəfli həyat yolundan danışdılar və bayram münasibətilə tədbir iştirakçılarını təbrik etdilər.
