Şriftin ölçüsü :

Saytın rəngi :

Sahibkarlığın güzəştli kreditləşdirilməsi məsələlərinə dair işgüzar forum

04 avqust 2016 | 16:00

Avqustun 4-də İqtisadiyyat Nazirliyinin Sahibkarlığa Kömək Milli Fondu Qaratəpə kəndində sahibkarlığın güzəştli kreditləşdirilməsi məsələlərinə dair işgüzar forum keçirmişdir.
Tədbirdə sahibkarlara güzəştli kreditlərin alınması mexanizmi barədə məlumat verilmiş, rayonumuzda həyata keçirilməsi məqsədəuyğun hesab olunan nümunəvi  layihələr təqdim olunmuş, sahibkarların investisiya layihələri maliyyələşdirilmişdir.
100-ə yaxın sahibkarın iştirak etdiyi forum çərçivəsində rayonumuzun iqtisadi potensialının reallaşdırılması məqsədilə prioritet hesab olunan ixtisaslaşdırılmış «Yaşıl market»in, iri fermer, intensiv bağçılıq, cinc heyvandarlıq təsərrüfatlarının, meyvə-tərəvəz və süd emalı müəssisələrinin və 3 ulduz otelin yaradılması üzrə nümunəvi investisiya layihələrinin təqdimatı keçirilmiş, kiçik həcmli investisiya layihələrinin ümumi dəyərinin 100 faizədək hissəsinin dövlətin güzəştli kreditləri hesabına maliyyələşdiriləcəyi bildirilmiş, sahibkarlara nümunəvi layihələr və metodiki materiallar paylanmışdır.
Sahibkarlığa Kömək Milli Fondunun icraçı direktoru Şirzad Abdullayev vurğulamışdır ki, 2016-cı ilin ötən dövrü ərzində 1460 sahibkara 78,3 milyon manat güzəştli kredit verilmişdir. Bu kreditlərdən istifadə etməklə investisiya layihələrinin reallaşdırılması 3500-dən çox yeni iş yerinin yaradılmasına imkan verir.
Qeyd edilmişdir ki, ümumilikdə indiyədək Aran iqtisadi rayonunda fəaliyyət göstərən sahibkarlıq subyektlərinin 12400-dən çox investisiya layihəsinin maliyyələşdirilməsinə 488 milyon manat güzəştli kredit verilmişdir.
İşgüzar forum çərçivəsində Sabirabaddan və ətraf rayonlardan olan 55 sahibkara 833 min manat güzəştli kredit verilmişdir. Həmin kreditlər əsasən pambıqçılıq, heyvandarlıq, taxılçılıq, balıqçılıq, meyvə şirələrinin istehsalı sahələrinin inkişafına yönəldiləcəkdir. Bu kreditlərin reallaşdırılması hesabına 80-dən çox yeni iş yerinin açılması mümkün olacaqdır.
Forumda rayon İcra Hakimiyyəti başçısının səlahiyyətlərini icra edən Həsən Həsənov iştirak və çıxış etmişdir.

Keçidlər