Home Contact Phone
background

Xəbərlər

  • Sabirabad rayon icra hakimiyyəti başçısının ...

    Sabirabad rayon icra hakimiyyəti başçısının növbəti səyyar görüş-qəbulu Əliləmbəyli kəndində keçirilmişdir

    2022-03-29

    Sabirabad rayonunun Əliləmbəyli kəndində əhalini narahat edən məsələləri yerində araşdırmaq və mövcud problemlərin aradan qaldırılmasını təmin etmək məqsədilə 29 mart 2022-ci il tarixdə Sabirabad rayon icra hakimiyyətinin başçısı Siraqəddin Cabbarov tərəfindən vətəndaşlarla səyyar-qəbul keçirilib. Qəbulda rayonun hüquq mühafizə orqanlarının, xidmət təşkilatları və aidiyyəti idarə rəhbərləri iştirak ediblər. S.Cabbarov tədbiri giriş sözü ilə açaraq Vətən mübaribəsində ordumuzun şanlı qələbəsi, işğaldan azad olunmuş ərazilərdə bərpa işlərinin aparılması, cənab Prezident tərəfindən qəbul edilən, əhalinin sosial müdafiəsinə və rifah halının yüksəldilməsinə yönəldilmiş qərarlardan, o cümlədən minimum əmək haqları və pensiyaların, tələbələrin təqaüdlərinin, müharibə veteranlarına, şəhid ailələrinə verilən müavinətlərin əhəmiyyətli dərəcədə artırılmasından və eyni zamanda müxtəlif dövlət təşkilatlarında çalışan işçilərin əmək haqlarının artırılması istiqamətində həyata keçirilən tədbirlər barədə geniş məlumat verib. Rayon rəhbəri rayonda və Əliləmbəyli ərazisində son illərdə həyata keçirilən tikinti-quruculuq, abadlıq işləri, açılan yeni iş yerləri barədə məlumat verib və qarşıda duran vəzifələri qeyd edib. Qəbulda vətəndaşıların təklif, müraciət və şikayətləri dinlənilib. Kənd sakinlərindən Əlifağa Xanməmmədov, Müzəffər Zautadze, Məcid Xəlilov, Dilbər Cavadova, Rahil Yusifov və başqalarının müraciətlərində qaldırılan məsələlərin bir qisminin həllinə yerindəcə köməklik göstərilib, araşdırılmasına ehtiyac olan bir sıra məsələlərin isə qanunvericiliyə uyğun, operativ həlli üçün təşkilat rəhbərlərinə müvafiq tapşırıqlar verilib. Həlli mərkəzi icra hakimiyyəti orqanlarından asılı olan məsələlərlə bağlı qeydlər aparılıb.

  • Novruz yurdumuza xeyir-bərəkəti ilə qədəm qo...

    Novruz yurdumuza xeyir-bərəkəti ilə qədəm qoyur

    2022-03-20

    Novruz Azərbaycan xalqının zəngin maddi və mənəvi dəyərlərinin mühüm tərkib hissəsini özündə ehtiva edən bayramdır. Qərinələr əvvəl olduğu kimi, indi də Novruz Azərbaycanda, Türkiyədə (daha çox şərqi Anadolu bölgəsində) və Orta Asiya dövlətlərində bahar bayramı kimi qeyd olunmaqdadır. Novruzun əsasında xalq mərasimləri dayanır. Bu bayram şimal yarımkürəsində 20-21 martda baş verən yaz bərabərləşməsi ilə əlaqələndirilir. Təbiətin oyanması, canlanması, bitkilərin yenidən öz yaşıl rənginə bürünməsi, yeniləşmə gününün ilk başlanğıcı şəms (günəş) təqviminin ilk ayının ilk gününə təsadüf edir. Novruz yeni ilin ilk günüdür və farsca da yeni gün deməkdir. Alimlərin fikrincə, Novruzun tarixi çox qədimdir. Elmi araşdırmalara görə, Novruz bayramının başlanması qədim dövrlərə - Zərdüşt peyğəmbərin dövrünə gedib çıxır. Bir sıra tədqiqatlarda isə Novruzla Zərdüştlüyün oxşar və fərqli cəhətləri müqayisə olunur . Həmin tədqiqatçılar isə belə qənaətə gəliblər ki, Novruzun tarixi Zərdüştlükdən çox qədimdir. Çünki günəşin müqəddəs sayılması odun müqəddəs hesab edilməsindən əvvəldir. Alimlər bayramın yaşını 3700-5000 il müəyyən edirlər. Eyni zamanda, bəzi araşdırmalarda türklərdə odun təmizləyici funksiyasının, atəşpərəstlikdəki müqəddəslikdən fərqli olduğu fikri irəli sürülür. Məsələn, biz tonqalın üzərindən atlanarkən “ağırlığım, uğurluğum, azarım-bezarım odlara” və s. bu kimi ifadələr səsləndiririk ki, bunlar odun müqəddəs hesab olunması anlayışı ilə qətiyyən uzlaşmır. Bu da tədqiqatçılara imkan verir ki, türklərdə odun müqəddəs deyil, təmizləyici, arındırıcı olduğu qənaətinə gəlsinlər.

  • Sabirabadda yerləşən N saylı hərbi hissədə ...

    Sabirabadda yerləşən N saylı hərbi hissədə Novruz şənliyi təşkil olunub

    2022-03-16

    Sabirabad rayonunda yerləşən N saylı hərbi hissədə Novruz şənliyi təşkil olunub. Novruz tədbirində Sabirabad rayon icra hakimiyyəti başçısının birinci müavini Həsən Həsənov, Sabirabad Regional Mədəniyyət İdarəsinin rəisi Fərid Qurbanzadə, Sabirabad rayon Gənclər və idman idarəsinin rəisi Nadir Quliyev, AVMVİB Sabirabad rayon şöbəsinin sədri Faiq Hüseynov, Təhsil Nazirliyinin Azad Həmkarlar İttifaqının Sabirabad rayon Komitəsinin sədri Seyidhüseyn Hüseynov, hərbi hissənin şəxsi heyəti, valideynlər iştirak edib. Əvvəlcə Vətən uğrunda canlarını qəhrəmancasına fəda etmiş şəhidlərin əziz xatirəsi bir dəqiqəlik sükutla yad edilib. Tədbirdə çıxış edənlər bayram münasibətilə hərbi hissənin şəxsi heyətini təbrik edib, onlara çətin və şərəfli xidmətdə - Vətənin müdafiəsində uğurlar arzulayıblar. Bildirilib ki, Müzəffər Ali Baş Komandan İlham Əliyevin rəhbərliyi altında Azərbaycan Ordusu öz üzərinə düşən missiyanı layiqincə yerinə yetirərək 44 günlük Vətən müharibəsində Zəfər qazanıb.

  • Sabirabad rayon icra hakimiyyəti başçısının ...

    Sabirabad rayon icra hakimiyyəti başçısının növbəti səyyar görüş-qəbulu Axısxa kəndində keçirilmişdir

    2022-03-15

    Sabirabad rayon icra hakimiyyətinin başçısı Siraqəddin Cabbarovun Axısxa kənd sakinləri ilə səyyar görüş-qəbulu keçirilib. Görüşdə rayon İcra Hakimiyyətinin başçısı aparatının məsul işçiləri, hüquq-mühafizə orqanlarının və xidmət təşkilatlarının rəhbərləri iştirak etmişlər. Sabirabad rayon icra hakimiyyətinin başçısı Siqaqəddin Cabbarov çıxış edərək kənd sakinlərini salamlamış, ölkəmizdə sosial-iqtisadi sahədə qazanılan uğurlardan, eləcə də Sabirabad rayonunda aparılan tikinti-quruculuq, abadlıq işlərindən, əhalinin sosial problemlərinin həlli istiqamətində həyata keçirilən tədbirlərdən ətraflı məlumat vermişdir. Səyyar görüş-qəbulda çıxış edən kənd sakinlərindən Etibar Səmədov, Osman Çaxov, Əlzamin Sadıqov və başqaları kəndin mövcud problemlərdən danışmışlar. Görüş-qəbulda vətəndaşlar tərəfindən qaldırılan məsələlərin bir qismi yerindəcə öz həllini tapıb, digər məsələlərin həlli ilə bağlı rayon icra hakimiyyətinin başçısı aidiyyatı təşkilatların rəhbərlərinə müvafiq tapşırıq və göstərişlər vermişdir.

  • Sabirabad rayonunda Novruz bayramı münasibətil...

    Sabirabad rayonunda Novruz bayramı münasibətilə “Xonça” festivalı keçirilmişdir

    2022-03-15

    15 mart 2022-ci il tarixində Sabirabad rayon Mədəniyyət Mərkəzində Novruz bayramı münasibətilə “Xonça” festivalı keçirilmişdir. Festival Sabirabad rayon İcra Hakimiyyətinin təşəbbüsü, Sabirabad Regional Mədəniyyət İdarəsi və Sabirabad rayon Gənclər və idman idarəsinin birgə təşkilatçılığı ilə baş tutmuşdur. Tədbirdə Sabirabad rayonunda fəaliyyət göstərən bir sıra dövlət qurumlarının rəhbər və əməkdaşları, Vətən müharibəsi şəhidlərinin ailə üzvləri və rayon ictimaiyyətinin nümayəndələri iştirak etmişdir. Aparıcılar “Xonça” festivalı haqqında məlumat verdikdən sonra Sabirabad Dövlət Sosial-İqtisad Kollecinin, Sabirabad rayon Peşə Liseyinin, həmçinin rayonun bir sıra orta ümumtəhsil məktəblərinin şagird və tələbələri tərəfindən hazırlanmış bayram xonçaları təqdim olunmuşdur. Daha sonra Sabirabad rayon icra hakimiyyətinin başçısı Siraqəddin Cabbarov çıxış edərək, başda şəhid ailələri olmaqla, rayon ictimaiyyətini Novruz bayramı münasibətilə təbrik etmişdir. Tədbir Sabirabad Regional Mədəniyyət İdarəsi tərəfindən təşkil olunmuş konsert proqramı ilə davam etmişdir.

  • Sabirabad rayon icra hakimiyyətinin başçısı S...

    Sabirabad rayon icra hakimiyyətinin başçısı Surra kəndində səyyar görüş-qəbul keçirmişdir

    2022-03-10

    Sabirabad rayon icra hakimiyyətinin başçısı Siraqəddin Cabbarovun Surra kənd sakinləri ilə səyyar görüş-qəbulu keçirilib. Görüşdə rayon İcra Hakimiyyətinin başçısı aparatının məsul işçiləri, hüquq-mühafizə orqanlarının və xidmət təşkilatlarının rəhbərləri iştirak etmişlər. Sabirabad rayon icra hakimiyyətinin başçısı Siqaqəddin Cabbarov çıxış edərək kənd sakinlərini salamlamış, ölkəmizdə sosial-iqtisadi sahədə qazanılan uğurlardan, eləcə də Sabirabad rayonunda aparılan tikinti-quruculuq işlərindən, əhalinin sosial problemlərinin həlli istiqamətində həyata keçirilən tədbirlərdən ətraflı məlumat vermişdir. Səyyar görüş-qəbulda çıxış edən kənd sakinlərindən Valeh Mayılov, Fariz Babayev, Muxtar Mənsimov və başqaları kəndin mövcud problemlərdən danışmışlar. Görüş-qəbulda vətəndaşlar tərəfindən qaldırılan məsələlərin həlli ilə bağlı rayon icra hakimiyyətinin başçısı aidiyyatı təşkilatlarının rəhbərlərinə müvafiq tapşırıq və göstərişlər vermişdir.

  • Sabirabad rayon icra hakimiyyətinin başçısı S...

    Sabirabad rayon icra hakimiyyətinin başçısı Siraqəddin Cabbarovun Surra kəndində bir qrup şəhid ailələri ilə növbəti görüşü keçirilib

    2022-03-10

    Azərbaycan Respublikasının Prezidenti cənab İlham Əliyevin tapşırığına uyğun olaraq Surra kəndində keçirilən səyyar qəbuldan sonra Sabirabad rayon icra hakimiyyətinin başçısı Siraqəddin Cabbarov hüquq-mühafizə orqanlarının, xidmət təşkilatlarının rəhbərləri və RİHB aparatının məsul işçilərinin iştirakı ilə Surra kəndinə yaxın ərazisində yaşayan bir qrup şəhid ailələri ilə görüşüb, onların problemləri və qayğıları ilə maraqlanıb.

  • 8 Mart - Beynəlxalq Qadınlar Günüdür

    8 Mart - Beynəlxalq Qadınlar Günüdür

    2022-03-08

    8 Mart - iqtisadi, ictimai və siyasi bərabərlik uğrunda mübarizədə qadınların beynəlxalq həmrəylik günüdür. Beynəlxalq Qadınlar Gününün bayram kimi qeyd edilməsi Klara Setkinin təklifi ilə 1910-cu ildə sosialist qadınların 2-ci Beynəlxalq konfransında (Kopenhagen) qərara alınıb. Qadınlar günü ilk dəfə 1911-ci ildə Almaniya, Avstriya, İsveçrə və Danimarkada keçirilib. Rusiyada 1913-cü ildə, Azərbaycanda isə 1917-ci ildə qeyd edilib. 1914-cü ilədək Beynəlxalq Qadınlar Günü müxtəlif günlərdə keçirilirdi. Beynəlxalq Qadınlar Gününün martın 8-də keçirilməsi Avstriya, Macarıstan, Rusiya, ABŞ və digər ölkələrin qadınlarının öz həmrəylik gününü məhz bu tarixdə qeyd etməsindən sonra ənənə halını aldı. Həmin vaxtdan bütün ölkələrdə qadınlar 8 Martı sülh uğrunda mübarizədə həmrəylik günü kimi də qeyd edirlər. 1965-ci ildən keçmiş SSRİ-də 8 Mart - Beynəlxalq Qadınlar Günü istirahət günü elan olunub.

  • Səfərbərlik və Hərbi Xidmətə Çağırış ...

    Səfərbərlik və Hərbi Xidmətə Çağırış üzrə Dövlət Xidmətinin rəisi Arzu Rəhimov Sabirabadda vətəndaşları qəbul edib

    2022-03-04

    Azərbaycan Respublikasının Prezidenti cənab İlham Əliyevin tapşırığına və mərkəzi icra hakimiyyəti orqanlarının, digər qurumların rəhbərlərinin 2022-ci ilin mart ayında şəhər və rayonlarda vətəndaşların qəbulu cədvəlinə uyğun olaraq Səfərbərlik və Hərbi Xidmətə Çağırış üzrə Dövlət Xidmətinin rəisi, general-polkovnik Arzu Rəhimov martın 4-də Sabirabadda İmişli, Saatlı və Sabirabad rayonlarından olan vətəndaşların qəbulunu həyata keçirib. Qəbuldan əvvəl Sabirabad şəhərinin mərkəzi meydanında ucadılmış Ümummilli Lider Heydər Əliyevin abidəsi ziyarət edilərək, önünə gül dəstəsi qoyulub. Xidmət rəisi, general-polkovnik Arzu Rəhimovun keçirdiyi qəbulda 15 vətəndaşın müraciəti dinlənilib. Müraciətlər əsasən həqiqi hərbi xidmətə və ya işə qəbul, övladının xidmət yerinin müəyyənləşdirilməsi, şəhid adı və statusunun verilməsi, veteran adının və vəsiqəsinin verilməsi, eləcə də digər məsələlər ilə bağlı olub. Qəbul edilən vətəndaşların müraciətlərinin bir çoxu yerindəcə öz həllini tapıb, araşdırılmasına ehtiyac olan məsələlər qanunvericiliyə uyğun olaraq tədbirlər görülməsi üçün nəzarətə götürülüb. Bəzi vətəndaşlar tərəfindən qaldırılan və Xidmətin səlahiyyətlərinə aid olmayan müraciətlər isə aidiyyəti orqanlara çatdırılması üçün qeydiyyata alınıb. Bölgə sakinlərinin yerlərdə qəbulu və müraciətlərinə baxılması üçün daha rahat və əlverişli şərait yaradılmasından razılıqlarını ifadə edən vətəndaşlar göstərilən diqqət və qayğıya görə dövlətimizin başçısına minnətdarlıqlarını bildiriblər.

  • Sabirabad Rayon İcra Hakimiyyətində növbəti d...

    Sabirabad Rayon İcra Hakimiyyətində növbəti dəfə bir qrup şəhid ailələri ilə görüş keçirilib

    2022-03-03

    Sabirabad rayon icra hakimiyyətinin başçısı Siraqəddin Cabbarovun şəhid ailələri ilə növbəti görüşü keçirib. Görüş iştirakçılarını salamlayan RİH başçısı Siraqəddin Cabbarov bildirib ki, Azərbaycanın ərazi bütövlüyü uğrunda öz canından keçmiş şəhidlərin ailələrinə, o cümlədən müharibə əlillərinə dövlət tərəfindən böyük diqqət və qayğı göstərilir. Azərbaycan Respublikasının Prezidenti İlham Əliyevin rəhbərliyi ilə həyata keçirilən siyasətin əsas istiqamətlərindən biri də məhz şəhid ailələrinin, müharibə əlillərinin, veteranların sosial müdafiəsinin gücləndirilməsi, onların problemlərinin vaxtında həllinə nail olunmasıdır. Azərbaycanın ərazi bütövlüyü uğrunda şəhid olanların yaxınları ilə görüşən başçı onlara başsağlığı verib, səbr diləyib. Qeyd edib ki, 44 günlük Vətən müharibəsi Azərbaycan xalqının şanlı zəfər tarixidir. Bu tarix Azərbaycan əsgərinin qanı, canı bahasına əldə edilib. Görüşdə iştirak edən şəhid valideynləri övladlarının keçdikləri döyüş yolundan söz açıb, onlarla bağlı xatirələrini bölüşüblər. Vətən müharibəsində qəhrəmanlıq göstərərək qanı ilə tarix yazan igid oğullarımızın adları Azərbaycan xalqının hər bir fərdinin qəlbində yaşayacaq. Əbədiyyətə qovuşan şəhidlərimizin əziz xatirələri hər zaman ehtiramla yad ediləcək.

  • Sabirabad rayon icra hakimiyyətinin başçısı H...

    Sabirabad rayon icra hakimiyyətinin başçısı Həşimxanlı kəndində səyyar görüş-qəbul keçirmişdir

    2022-03-01

    Sabirabad rayon icra hakimiyyətinin başçısı Siraqəddin Cabbarovun Həşimxanlı kənd sakinləri ilə səyyar görüş-qəbulu keçirilib. Görüşdə rayon İcra Hakimiyyətinin başçısı aparatının məsul işçiləri, hüquq-mühafizə orqanlarının və xidmət təşkilatlarının rəhbərləri iştirak etmişlər. Sabirabad rayon icra hakimiyyətinin başçısı Siqaqəddin Cabbarov çıxış edərək kənd sakinlərini salamlamış, ölkəmizdə sosial-iqtisadi sahədə qazanılan uğurlardan, eləcə də Sabirabad rayonunda aparılan tikinti-quruculuq işlərindən, əhalinin sosial problemlərinin həlli istiqamətində həyata keçirilən tədbirlərdən ətraflı məlumat vermişdir. Səyyar görüş-qəbulda çıxış edən kənd sakinlərindən Naqil İsgəndərov, Babazadə Babaşov, Emin Nəcəfov və başqaları kəndin mövcud problemlərdən danışmışlar. Görüş-qəbulda vətəndaşlar tərəfindən qaldırılan məsələlərin həlli ilə bağlı rayon icra hakimiyyətinin başçısı aidiyyatı təşkilatlarının rəhbərlərinə müvafiq tapşırıq və göstərişlər vermişdir.

  • Sabirabad rayon icra hakimiyyətinin başçısı S...

    Sabirabad rayon icra hakimiyyətinin başçısı Siraqəddin Cabbarov Həşimxanlı kəndində bir qrup şəhid ailələri ilə görüşüb

    2022-03-01

    Azərbaycan Respublikasının Prezidenti cənab İlham Əliyevin tapşırığına uyğun olaraq mart ayından əhali ilə yerlərdə RİH başçılarının səyyar qəbullarının keçirilməsinə başlanılmışdır. Həşimxanlı kəndində keçirilən səyyar qəbuldan sonra Sabirabad rayon icra hakimiyyətinin başçısı Siraqəddin Cabbarov hüquq-mühafizə orqanlarının, xidmət təşkilatlarının rəhbərləri və RİHB aparatının məsul işçilərinin iştirakı ilə Həşimxanlı kəndinə yaxın ərazisində yaşayan bir qrup şəhid ailələri ilə görüşüb, onların problemləri və qayğıları ilə maraqlanıb. Görüş zamanı çıxış edən Sabirabad rayon icra hakimiyyətinin başçısı Siraqəddin Cabbarov qeyd etmişdir ki, hər birimiz şəhidlərimizə və qazilərimizə borcluyuq. Şəhidlərimizin, ümumilikdə hərbçilərimizin və Ali Baş Komandan, Müzəffər Prezident İlham Əliyevin düzgün qərarları, iradəsi sayəsində Azərbaycan torpaqları işğaldan azad olundu. Xalqımızın bir yumruq kimi birləşərək əsl həmrəylik, mübarizlik göstərdiyini, cənab Prezidentin ətrafında sıx birləşdiyini vurğulayan RİH başçısı qeyd edib ki, ordumuzun qüdrəti, döyüş ruhu, əzmi, Azərbaycan əsgərinin gücü ilə ərazilərimiz erməni işğalçılarından birdəfəlik təmizləndi. Bu böyük qələbənin əldə olunmasında Azərbaycan oğulları canlarından keçdilər. Şəhidlərimizə allahdan rəhmət, qazilərimizə isə şəfa diləyən S.Cabbarov ölkəmizdə dövlət səviyyəsində şəhid ailələrinə və ümumilikdə müharibə iştirakçılarına göstərilən diqqət və qayğıdan danışıb. Şəhid ailələri igidlərimizin Azərbaycanın azadlığı uğrunda döyüşdüyünü və öz müqəddəs borclarını şərəflə yerinə yetirdiklərini qeyd ediblər. Onlar ölkəmizdə şəhid ailələrinə dövlət səviyyəsində göstərilən diqqət və qayğıya görə Azərbaycan Respublikasının Prezidenti cənab İlham Əliyevə öz minnətdarlıqlarını bildiriblər. Rayon rəhbəri daha sonra şəhid ailələrinin müraciətləri ilə maraqlanıb. Səslənən müraciətlər arasında şəhid Nurullayev Anar Siyavuş oğlunun atası Nurallayev Siyavuş Mehbulla oğluna icarə əsasında verilmiş torpaq sahəsinin adına rəsmiləşdirilməsi, şəhid Ağayev Aqşin Şirvan oğlunun ailə üzvlərinə verilmiş torpaq sahəsinin sənədləşməsi, şəhidin, xidmət pulunun ödənilməməsinə köməklik göstərilməsi və bir sıra digər məsələlər yer alıb. Müraciətlərin bir hissəsi yerindəcə öz həllini tapıb, digər məsələlərlə bağlı aidiyyatı üzrə tapşırıqlar verilmişdir.

  • Xocalı soyqırımı qurbanlarının xatirəsi Sab...

    Xocalı soyqırımı qurbanlarının xatirəsi Sabirabad rayonunda da dərin kədər hissi ilə yad edilmişdir

    2022-02-25

    Sabirabad Rayon İcra Hakimiyyətinin və Sabirabad Regional Mədəniyyət İdarəsinin birgə təşkilatçılığı ilə Xocalı soyqırımının 30-cu il dönümü ilə əlaqədar anım tədbiri keçirilmişdir. Sabirabad rayon Bayraq Muzeyində təşkil olunan tədbirdə Sabirabad rayon icra hakimiyyətinin başçısı Siraqəddin Cabbarov, hüquq-mühafizə orqanlarının, müəssisə və təşkilatların rəhbərləri, ictimaiyyətin nümayəndələri iştirak etmişdir. İştirakçılar ilk öncə erməni cinayətkarlarının Xocalıda törətdiyi qətliamı özündə əks etdirən fotoşəkillərdən, kitablardan, dövri mətbuat materiallarından ibarət olan sərgiyə baxış keçirmişlər. Rayon icra hakimiyyətinin başçısı Siraqəddin Cabbarov tədbiri giriş sözü ilə açdıqdan sonra faciə qurbanlarının və Vətənimizin azadlığı, müstəqilliyi, suverinliyi uğrunda canlarından keçmiş bütün şəhidlərimizin əziz xatirəsi bir dəqiqəlik sükutla yad edilmişdir. Siraqəddin Cabbarov Xocalı soyqırımı barədə ətraflı məlumat vermiş, erməni cəlladlarının törətdikləri vəhşilikləri pisləmişdir. Qeyd etmişdir ki, Ermənistanın silahlı qüvvələri 1992-ci il fevralın 25-dən 26-na keçən gecə Rusiyanın 366-cı motoatıcı alayının yaxından köməyi, xarici ölkələrdən gələn erməni yaraqlılarının iştirakı ilə köməksiz insanlara qəflətən hücum etmişlər. Bu soyqırım nəticəsində həmin gecə Xocalıda 613 nəfər qətlə yetirilmişdir. Onlardan 63-ü uşaq, 106-sı qadın, 70-i qoca insanlar olmuşlar. 8 ailə tamamilə məhv edilmişdir. 25 uşaq hər iki valideynini, 130 uşaq isə valideynlərindən birini itirmişdir. 1275 nəfər əsir götürülmüşdür. Həmin adamlardan 150-sinin taleyi hələ də məlum deyil. Təəssüf ki, tarixin ən dəhşətli bir qırğınının baş verdiyi dövrdə Azərbaycanda hakimiyyətdəki rəhbərlər, eləcə də müxalifətçi qüvvələr bu faciəyə lazımi münasibət bildirməmişlər. Hər bir vətəndaşının müdafiəsini təmin etməyə borclu olan respublikanın o zamankı rəhbərliyi tam fəaliyyətsizlik, xalqın taleyinə biganəlik göstərmiş, onların köməyinə yetməmiş, dünya ictimaiyyətini vaxtında məlumatlandırmamışlar.

  • Sabirabad rayon icra hakimiyyəti başçısının ...

    Sabirabad rayon icra hakimiyyəti başçısının 2022-ci ilin mart ayında yerlərdə keçirəcəyi səyyar qəbulların Q R A F İ K İ

    2022-02-22

    1. 01.03.2022 – saat 10:30, Həşimxanlı kəndi (Həşimxanlı kənd mədəniyyət evi); 2. 10.03.2022 – saat 10:30, Surra kəndi (Surra kənd mədəniyyət evi); 3. 15.03.2022 – saat 10:30, Axısxa kəndi (Axısxa kənd sənətkarlıq evi); 4. 29.03.2022 – saat 10:30, Əliləmbəyli kəndi (Əliləmbəyli kənd mədəniyyət evi).

  • Sabirabad Rayon İcra Hakimiyyətində bir qrup ş...

    Sabirabad Rayon İcra Hakimiyyətində bir qrup şəhid ailəsi və müharibə iştirakçıları ilə növbəti dəfə görüş keçirilib

    2022-02-22

    Sabirabad rayon icra hakimiyyətinin başçısı Siraqəddin Cabbarov bir qrup Vətən müharibəsi şəhidlərinin ailə üzvləri və müharibə iştirakçıları ilə növbəti dəfə görüş keçirmişdir. Görüş zamanı çıxış edən RİH başçısı Siraqəddin Cabbarov qeyd etmişdir ki, Azərbaycan Respublikasının Prezidenti cənab İlham Əliyevin tapşırıq və göstərişlərinə uyğun olaraq şəhid ailələrinin, qaziləri, eləcə də müharibə veteranlarının etibarlı sosial müdafiəsinin təmin edilməsi, mənzil-məişət problemlərinin həll olunması, onlara verilən imtiyaz və güzəştlərin miqyasının genişləndirilməsi daim diqqət mərkəzində saxlanılır. Şəhidlərin ailə üzvləri çıxış edərək onlara daim qayğı ilə yanaşan ölkə başçısı cənab İlham Əliyevə və Birinci vitse-prezident xanım Mehriban Əliyevaya öz minnətdarlıqlarını bildirmiş, bir sıra məsələlərin həlli ilə bağlı arzu və təkliflərini səsləndirmişlər. RİH başçısı şəhid ailələrini, müharibə iştirakçılarını narahat edən sosial problemləri ilə maraqlanmış, qaldırılan məsələlərin həlli ilə bağlı müvafiq tapşırıqlar vermişdir.

  • Yeni Azərbaycan Partiyası Sabirabad rayon təşk...

    Yeni Azərbaycan Partiyası Sabirabad rayon təşkilatının yeni sədri rayon ictimaiyyətinə təqdim olundu

    2022-02-11

    Sabirabad rayon icra hakimiyyətinin başçısı Siraqəddin Cabbarov və YAP Sabirabad rayon təşkilatına yeni sədr təyin olunan Varis Rüstəmov rayonun hüquq-mühafizə, idarə, müəssisə, təşkilat rəhbərləri və ictimaiyyət nümayəndələri ilə görüş keçiriblər. Keçirilən görüşdə Sabirabad rayon icra hakimiyyətinin başçısı Siraqəddin Cabbarov çıxış edərək Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyi ilə fəaliyyət göstərən Yeni Azərbaycan Partiyasının şərəfli, zəngin inkişaf yolu keçdiyini bildirib. Ölkəmizin və regionumuzun ən böyük partiyası olan Yeni Azərbaycan Partiyası avanqard siyasi qüvvə olaraq ölkədə aparılan bütün mütərəqqi və məqsədyönlü işlərin önündə getmiş, Azərbaycanın siyasi sisteminə hər zaman yeniliklər gətirmiş və bu sahədə bir çox uğurlara imza atmışdır. Ulu Öndər Heydər Əliyevin təcrübəsi və siyasi peşəkarlığı sayəsində Yeni Azərbaycan Partiyasının ölkədə ən böyük və effektiv siyasi qüvvəyə çevrildiyini vurğulayıb. Siraqəddin Cabbarov Varis Rüstəmovu YAP Sabirabad rayon təşkilatının sədri təyin olunması münasibətilə təbrik edərək, gələcək işlərində uğurlar arzulayıb.

  • Sabirabad rayonunda 2 fevral Gənclər Günü mün...

    Sabirabad rayonunda 2 fevral Gənclər Günü münasibəti ilə tədbir keçrilmişdir

    2022-02-01

    2 fevral - Azərbaycan Gəncləri Gününün təsis edilməsinin 25 illiyi münasibətilə “Gənclər həftəsi” çərçivəsində Sabirabad rayon Gənclər və idman idarəsinin və Yeni Azərbaycan Partiyası Sabirabad rayon təşkilatının təşəbbüsü ilə Sabirabad rayon Mədəniyyət Mərkəzində tədbir təşkil olunmuşdur. Tədbirdə Sabirabad rayon icra hakimiyyətinin başçısı Siraqəddin Cabbarov, Yeni Azərbaycan Partiyası Sabirabad rayon təşkilatının sədri Varis Rüstəmov, rayonda fəaliyyət göstərən dövlət orqanlarının rəhbərləri, rayon ictimaiyyətinin nümayəndələri, gənclər iştirak etmişlər. İlk öncə Sabirabad rayon Gənclər və idman idarəsinin “Gənclər həftəsi” çərçivəsində həyata keçirdiyi tədbirlərdən bəhs edən videoçarx iştirakçılara nümayiş olunmuşdur. Daha sonra tədbirdə çıxış edən Sabirabad rayon icra hakimiyyətinin başçısı Siraqəddin Cabbarov Gənclər Günü münasibətilə gəncləri təbrik etmiş, Ulu Öndər Heydər Əliyev və onun layiqli davamçısı Prezident İlham Əliyev tərəfindən ölkəmizdə gənclərlə bağlı həyata keçirilən mütərəqqi dövlət siyasətindən danışmışdır. Natiq xüsusilə qeyd etmişdir ki, Azərbaycan gəncləri üçün ən həlledici sınaqlardan biri də sentyabrın 27-də başlayan və noyabrın 10-dək davam edən Vətən müharibəsi oldu. Rəşadətli Azərbaycan Ordusunun sıralarında Vətən uğrunda vuruşan qəhrəman gənclərimiz adlarını xalqımızın ən yeni tarixinə qızıl hərflərlə yazdılar. Müzəffər Ali Baş Komandan İlham Əliyevin rəhbərliyi altında gənclərimizin rəşadəti sayəsində əldə olunan bu Şanlı Zəfər Azərbaycanın ərazi bütövlüyünü bərpa etdi, xalqımız otuz illik həsrətdən sonra tarixi torpaqlarımıza qovuşdu.

  • Yanğın təhlükəsizliyi qaydalarına əməl olu...

    Yanğın təhlükəsizliyi qaydalarına əməl olunmalıdır!

    2022-01-27

    Vətəndaşların təhlükəsizliyinin təmin olunması məqsədilə əhaliyə müraciət edərək, aşağıda göstərilən mühüm yanğın təhlükəsizliyi qaydalarına əməl olunmasının zəruriliyini bir daha xatırladırıq: - elektrik və qaz şəbəkəsinin quraşdırılmasını yalnız mütəxəssislərə həvalə edin və bu məqsədlə keyfiyyətli məhsullardan istifadə edin! - standartlara uyğun olmayan qaz cihazlarından istifadə zəhərlənmə, yanğın və partlayış təhlükəsi yaratdığından, onların istismarına yol verməyin! - elektrik xətləri və uzadıcılarını həddindən artıq yükləməyin! - elektrik avadanlıqları və qaz cihazlarını işlək vəziyyətdə qoyub mənzili tərk etməyin! - mənzil daxilində, eyvan və pilləkən qəfəslərində tezalışan yanar maddə saxlamayın! - mənzilə daxil olarkən qaz qoxusu hiss etdikdə işığı yandırmayın, qapı-pəncərələri açın, mənzilə qazın girişini bağlayın və mütəxəssis çağırın! - uşaqların elektrik və qaz cihazlarından istifadəsinə yol verməyin! - azyaşlıları nəzarətsiz qoymayın! - tam söndürülməmiş kibrit və siqaret kötüyünü zibil qutusuna və ya eyvandan atmayın! Nəzərə almaq lazımdır ki, yanğının qarşısını almaq onu söndürməkdən daha asandır. Özünüzün və yaxınlarınızın həyatını təhlükəyə atmayın! Mənzilinizi və əmlakınızı yanğından qoruyun!

  • Yanğın təhlükəsizliyi qaydaları ilə əlaqə...

    Yanğın təhlükəsizliyi qaydaları ilə əlaqədar FHN-in Dövlət Yanğın Nəzarəti Xidmətinin əhaliyə müraciəti

    2022-01-25

    Fövqəladə Hallar Nazirliyinin Dövlət Yanğın Nəzarəti Xidməti ölkədə yanğın təhlükəsizliyinin təmin olunması istiqamətində üzərinə düşən vəzifələrinin icrasını davam etdirir. Bu çərçivədə, respublika ərazisində baş verən yanğınların Xidmət tərəfindən aparılmış statistik təhlili göstərir ki, yanğınların böyük əksəriyyəti yaşayış sektorunun payına düşür. Yaşayış sektorunda baş verən yanğınların isə təqribən 50 faizi elektrik avadanlıqlarının, 15 faizi qaz cihazlarının (qurğularının) quraşdırılması və istismarı zamanı yanğın təhlükəsizliyi qaydalarının pozulması səbəbindən baş verir. Bununla yanaşı, odla və qaynaq vasitəsilə işlər görülərkən ehtiyatsızlıq, nəzarətsiz qalan uşaqların odla oynaması kimi səbəblər də yanğınların baş verməsində əsas faktorlardandır. Qeyd olunanlarla bağlı vətəndaşlarımızın təhlükəsizliyinin təmin olunması məqsədilə əhaliyə müraciət edərək, aşağıda göstərilən mühüm yanğın təhlükəsizliyi qaydalarına əməl olunmasının zəruriliyini bir daha xatırladırıq: - elektrik və qaz şəbəkəsinin quraşdırılmasını yalnız mütəxəssislərə həvalə edin və bu məqsədlə keyfiyyətli məhsullardan istifadə edin! - standartlara uyğun olmayan qaz cihazlarından istifadə zəhərlənmə, yanğın və partlayış təhlükəsi yaratdığından, onların istismarına yol verməyin! - elektrik xətləri və uzadıcılarını həddindən artıq yükləməyin! - elektrik avadanlıqları və qaz cihazlarını işlək vəziyyətdə qoyub mənzili tərk etməyin! - mənzil daxilində, eyvan və pilləkən qəfəslərində tezalışan yanar maddə saxlamayın! - mənzilə daxil olarkən qaz qoxusu hiss etdikdə işığı yandırmayın, qapı-pəncərələri açın, mənzilə qazın girişini bağlayın və mütəxəssis çağırın! - uşaqların elektrik və qaz cihazlarından istifadəsinə yol verməyin! - azyaşlıları nəzarətsiz qoymayın! - tam söndürülməmiş kibrit və siqaret kötüyünü zibil qutusuna və ya eyvandan atmayın! Nəzərə almaq lazımdır ki, yanğının qarşısını almaq onu söndürməkdən daha asandır. Özünüzün və yaxınlarınızın həyatını təhlükəyə atmayın! Mənzilinizi və əmlakınızı yanğından qoruyun! Unutmayın: Qaydalara biganəlik – həyatımıza təhlükədir! Təhlükə zamanı 112-yə zəng vurun!

  • Təhsil naziri Emin Əmrullayev Sabirabadda Təhsi...

    Təhsil naziri Emin Əmrullayev Sabirabadda Təhsil naziri Sabirabadda Nizami kənd tam orta məktəb binasının əsaslı təmirdən sonra açılışında iştirak edib

    2022-01-24

    Yanvarın 24-də təhsil naziri Emin Əmrullayev Sabirabad rayonuna səfər edib. Əvvəlcə Ulu öndər Heydər Əliyevin abidəsi ziyarət edilib, önünə gül dəstələri düzülüb. Səfər çərçivəsində Sabirabad rayonu Mirhüseyn Məmmədov adına Nizami kənd tam orta məktəbinin əsaslı təmirdən sonra açılış mərasimi keçirilib. Mərasimdə təhsil naziri Emin Əmrullayev, millət vəkilləri Kamal Cəfərov, Ramin Məmmədov, Sabirabad rayon icra hakimiyyətinin başçısı Siraqəddin Cabbarov, Sabirabad rayon Təhsil şöbəsinin müdiri Pəhlivan Qarayev iştirak edib. Tədbir iştirakçıları məktəbdə yaradılmış şəraitlə tanış olublar. Bildirilib ki, yeni tikilmiş məktəb 624 şagird yerlikdir. 19 sinif otağından ibarət ümumi təhsil müəssisəsində 3 laboratoriya, 2 texnologiya, 2 informatika, çağırışaqədərki hazırlıq kabineti, məktəbəhazırlıq otağı, 96 yerlik akt zalı, idman zalı, kitabxana və 100 yerlik yeməkxana fəaliyyət göstərəcək.

  • Təhsil naziri Emin Əmrullayev Sabirabadda STEAM ...

    Təhsil naziri Emin Əmrullayev Sabirabadda STEAM Mərkəzinin açılışında iştirak edib

    2022-01-24

    Sabirabad şəhəri Mirzə Ələkbər Sabir adına 1 nömrəli tam orta məktəbdə yaradılan STEAM Mərkəzinin açılışı olub. Mərkəzdə yaradılmış şəraitlə tanış olan tədbir iştirakçılarına bildirilib ki, Mərkəz regional xarakter daşıyır. Belə ki, Sabirabad rayonunun kəndlərindən, eləcə də Saatlı və digər qonşu rayonlardan olan məktəblilərin də bu Mərkəzdən faydalanması nəzərdə tutulur. Qeyd edək ki, hazırda ölkə üzrə 100 mindən çox şagirdi əhatə edən STEAM layihəsinin növbəti tədris ilində genişləndirilməsi planlaşdırılır.

  • Təhsil naziri Emin Əmrullayev Sabirabadda 4 rayo...

    Təhsil naziri Emin Əmrullayev Sabirabadda 4 rayonun təhsil ictimaiyyəti ilə görüşüb

    2022-01-24

    Yanvarın 24-də təhsil naziri Emin Əmrullayev Sabirabad rayonuna səfəri çərçivəsində Sabirabad, Saatlı, İmişli və Beyləqan rayon təhsil şöbə müdirləri və müdir müavinləri ilə görüşüb. Heydər Əliyev Mərkəzində baş tutan görüşdə qeyd edilən bölgələr üzrə şagird sayı 200-dən çox olan məktəblərin direktorları da iştirak edib. Görüş zamanı sözügedən bölgələrdə təhsil sahəsinin mövcud problemləri və həlli istiqamətində müvafiq fikirlər səsləndirilib. Sonda görüş iştirakçılarının sualları cavablandırılıb.

  • 20 Yanvar faciəsindən 32 il keçir

    20 Yanvar faciəsindən 32 il keçir

    2022-01-20

    1990-cı il yanvarın 20-si Azərbaycanın müasir tarixinə ən faciəli günlərdən biri, eyni zamanda, xalqımızın qəhrəmanlıq səhifəsi kimi daxil olub, milli müstəqillik, azadlıq uğrunda mübarizəsinin və yenilməz iradəsinin rəmzinə çevrilib. Təpədən-dırnağadək silahlanmış keçmiş sovet ordusunun cəza tədbirlərinə məruz qalan xalqımız azadlıq əzmini itirməmiş, əksinə, haqq səsini daha ucadan bəyan etmişdi. Doğma Vətəninin, xalqının azadlığını, şərəf və ləyaqətini hər şeydən uca tutan vətənpərvər Azərbaycan övladları düz 32 il əvvəl həmin müdhiş gecədə canlarından keçərək şəhidlik zirvəsinə ucaldılar. Sovet qoşunlarının Azərbaycanda törətdiyi qanlı qırğından uzun illər keçməsinə baxmayaraq, xalqımız o dəhşətli günlərin ağrı-acısını unutmur, öz vətəndaşlarına divan tutan sovet imperiyasının ovaxtkı rəhbərlərinə və onların Azərbaycandakı əlaltılarına dərin nifrətini bildirir. Keçmiş SSRİ rəhbərliyinin Azərbaycana qarşı qərəzli, ermənipərəst siyasətinə, əzəli torpaqlarımıza iddia edən Ermənistanın təcavüzkar siyasətinin açıq-aşkar dəstəklənməsinə və respublikanın ozamankı rəhbərliyinin xəyanətkar mövqeyinə etiraz əlaməti olaraq ayağa qalxmış geniş xalq kütlələrinin üzərinə sovet ordusunun iri hərbi birləşmələrinin yeridilməsi Azərbaycanda, xüsusilə Bakıda misli görünməmiş faciəyə gətirib çıxardı, böyük itkilərlə, günahsız insanların ölümü ilə nəticələndi.

  • Sabirabad rayonunda 20 Yanvar şəhidləri böyük...

    Sabirabad rayonunda 20 Yanvar şəhidləri böyük ehtiramla yad edilib

    2022-01-20

    20 Yanvar faciəsinin 32-ci ildönümü münasibətilə rayon içtimaiyyətinin nümayəndələrinin iştirakı ilə “Şəhidlər xiyabanı”nın qarşısında mərasim keçirilmişdir. Tədbiri Sabirabad Rayon İcra Hakimiyyətinin başçısı Siraqəddin Cabbarov açmış, şəhidlərin hünər və qəhrəmanlıq yolundan danışmış, həmin dövrü geniş təhlil etmiş və ölkə rəhbərliyinə qayıdışından sonra 1994-cü ildə 20 Yanvar hadisələrinə siyasi-hüquqi qiymət verilməsini Ümummilli liderimiz Heydər Əliyevin xalqımız qarşısında əvəzsiz xidmətlərindən biri kimi dəyərləndirmişdir. Natiq bildirmişdir ki, müqəddəs amallar uğrunda şəhid olanların ömrü Vətənin və Xalqın ömrü qədərdir. Odur ki, biz qürurluyuq ki, şəhidlərimiz Vətənimizin azadlığı uğrunda canlarını fəda etmişlər. Bakı vaxtı ilə saat 12:00-da şəhidlərin əziz xatirəsi bir dəqiqəlik sükutla yad olunmuş və avtomobillərdən səs siqnalları verilmişdir. RİHB aparatının məsul şəxsləri, hüquq-mühafizə orqanlarının, idarə, müəssisə və təşkilatların rəhbərləri, ağsaqqallar, ziyalılar, din xadimləri, Qarabağ müharibəsi veteranları, şəhid ailələri, gənclər, təhsil və mədəniyyət müəssisələrinin kollektivləri xiyabanı ziyarət etmiş və şəhidlərə öz ehtiramlarını bildirmişlər.

  • Sabirabad rayonunda qanvermə aksiyası keçirilmi...

    Sabirabad rayonunda qanvermə aksiyası keçirilmişdir

    2022-01-11

    Azərbaycan Respublikasının Prezidenti cənab İlham Əliyevin və Azərbaycan Respublikasının Birinci vitse-prezidenti, hörmətli Mehriban xanım Əliyevanın diqqət və qayğısı sayəsində talassemiya xəstəliyindən əziyyət çəkən xəstə uşaqlara kömək göstərmək, bu insanların həyatlarını xilas etmə yönündə nəcib təşəbbüslər dövlətimizin uğurlu siyasətinin əsas istiqamətlərindəndir. B.Eyvazov adına Hematologiya Transfiziologiya İnstitutunun nəzdində fəaliyyət göstərən Mərkəzi Qan Bankının təşkilatçılığı ilə Sabirabad Olimpiya İdman Kompleksində talassemiya xəstəliyindən əziyyət çəkən xəstə uşaqlara kömək məqsədi ilə qanvermə aksiyası keçirilmişdir. Aksiyada Sabirabad Rayon İcra Hakimiyyətinin, YAP Sabirabad rayon təşkilatının, hüquq-mühafizə orqanlarının, idarə, müəssisə və təşkilatların kollektivləri, ictimaiyyətin nümayəndələri, gənclər könüllü iştirak etmişlər. Yığılan qan ehtiyatı yoxlanılaraq talassemiya, hemofiliya və digər qan xəstəliklərindən əziyyət çəkən insanlar üçün istifadə olunacaq.

əvvəlki [2] növbəti